Непрыкметны сілавік з Глыбокага: Пяць фактаў пра звольненага старшыню Следчага камітэта Валянціна Шаева
Аляксандр Лукашэнка вызваліў Валянціна Шаева ад абавязкаў кіраўніка Следчага камітэта «па згодзе бакоў». Новы старшыня СК пакуль не прызначаны. «НН» сабрала цікавыя факты з біяграфіі сілавіка.
Наступнік Вакульчыка
Фота БелТА
Валянцін Шаеў нарадзіўся ў 1964-м у Глыбокім. І да 2006 года ягоная біяграфія ўвесь час была цесна звязаная з Віцебскай вобласцю. Пасля таго, як у 1991 Шаеў скончыў БДУ па спецыяльнасці «правазнаўства», ён пачаў працаваць у органах пракуратуры. Быў пракурорам Расонскага і Віцебскага раёнаў, а таксама Гомельскай вобласці. Менавіта з Гомельшчыны яго забралі ў Мінск.
У 2011 у Беларусі пачалося стварэнне Следчага камітэта, які забіраў частку функцый у Генеральнай пракуратуры і міліцыі. Менавіта на Следчы камітэт цяпер кладзецца расследванне большасці крымінальных справаў. Першым кіраўніком СК быў Валерый Вакульчык, якога праз год працы павысілі да старшыні КДБ.
У лістападзе 2012 Валянцін Шаеў стаў кіраваць Следчым камітэтам. Хоць самому Шаеву не асабліва ўдалося абрасці аўтарытэтам і важнасцю — харызмы яму відавочна не ставала, — але структура запрацавала даволі спраўна. На сёння СК – гэта самае адкрытае і празрыстае сілавое ведамства ў краіне. Паглядзім, ці застанецца такая палітыка пры новым кіраўніку.
Адзіны, хто не атрымаў новыя пагоны
Фота Сяргея Гудзіліна
Пра адстаўку Шаева загаварылі яшчэ ў маі. Гэткая канспіралагічная версія, але яна таксама мае права на жыццё. Напярэдадні Дня Перамогі Аляксандр Лукашэнка раздаваў новыя званні кіраўнікам практычна ўсіх сілавых ведамстваў. Генерал-лейтэнантамі сталі міністр абароны Андрэй Раўкоў, кіраўнік МУС Ігар Шуневіч, старшыня КДБ Валерый Вакульчык, міністр па надзвычайных сітуацыях Уладзімір Вашчанка. А генеральны пракурор Аляксандр Канюк атрымаў чын «дзяржаўны дарадца юстыцыі першага класа». Фактычна адзіным сілавіком з ключавых ведамстваў, хто не атрымаў павышэння, быў якраз Шаеў.
Бацька трох сыноў
Фота БелТА
У Валянціна Шаева вялікая сям’я, ён з’яўляецца бацькам трох сыноў. Двое малодшых па стане на пачатак году яшчэ хадзілі ў садок, старэйшы – у гімназію. Шаеў прызнаваўся, што жонка ўсё ж праводзіць больш часу з дзецьмі, але «асновы псіхікі і характару» закладвае ён сам: «Я ніколі не баяўся заставацца з дзецьмі адзін. Я стараюся навучыць дзяцей самастойнасці. Старэйшы сын ад пачатку хадзіў сам у школу і на трэніроўкі па каратэ».
Кажа, што любіць катацца з дзецьмі на каруселях у парку Чалюскінцаў. А вось бацькоў Валянціна Шаева ў жывых ужо няма.
«Сустракаць Новы год абавязкова трэба з бацькамі. Раней я адзначаў свята дзе заўгодна: з калегамі, сябрамі, на працы, у асяроддзі жонкі і дзяцей. А калі ўсвядоміў, што хочацца ў гэты момант знаходзіцца побач з бацькамі, такой магчымасці не стала…», — расказваў Шаеў летась.
Надзел у Драздах
Фота БелТА
Вялікай сям’і – вялікі дом. У красавіку 2014 года Валянцін Шаеў атрымаў надзел плошчай 0,12 га ў так званых «Драздах-2», мінскім раёне «Вяснінка». Рэальная рынкавая цана такога пустога надзела – $600-700 тысяч даляраў. Колькі гэта афіцыйных гадавых заробкаў для беларускага чыноўніка?
Цікава, што перад гэтым Валянцін Шаеў прапанаваў увесці дадатковую адказнасць для занадта багатых чыноўнікаў: «Такая адказнасць магла б быць у выглядзе спагнання ў даход дзяржавы маёмасцi, памер якой значна перавышае даходы чыноўніка і паходжанне якой гэта службовая асоба не можа пацвердзіць». Залатыя словы.
Аматар валейбола
Фота bvf.by
Як і большасць высокіх чыноўнікаў, Валянцін Шаеў меў нагрузку ў выглядзе кіраўніцтва адной з спартыўных федэрацый. Год таму сілавік узначаліў федэрацыю валейбола. Гэта від спорта, у якім беларусы маюць неблагія вынікі. Напрыклад, трапляюць на чэмпіянат Еўропы. Але валейбол у грамадстве зусім не раскручаны, яго рэдка паказваюць па тэлевізары, пішуць у газетах. Здзейсніць нейкі прарыў у гэтым накірунку так і не атрымалася. У Беларусі часцей за ўсё, страчваючы асноўную пасаду, чыноўнік пазбаўляецца і працы ў федэрацыі. Хіба Уладзімір Канаплёў у гандболе быў выключэннем з гэтай серыі.
