SpaceX зноў не здолела мякка пасадзіць шматразовую ракету
Пасадка не выйшла мяккай праз надвор’е, тлумачыць Space.com.
Фота з твітара Элана Маска
Прыватная кампанія SpaceX у сераду паспяхова запусціла спадарожнік DSCOVR, што будзе сачыць за актыўнасцю Сонца. Запуск меўся стаць гістарычным: кампанія зноў збіралася мякка пасадзіць ступень ракеты Falcon 9 на марскую платформу.
Ад плану з мяккай пасадкай прыйшлося адмовіцца праз цяжкія ўмовы надвор’я. Ракета прываднілася проста ў мора — мяркуючы па фота з твітара заснавальніка SpaceX Элана Маска, зусім не мякка.
Але сам Маск вынікамі задаволены: пасадка адбылася вертыкальна і ўсяго ў 10 метрах ад платформы. Пры добрым надвор’і, на яго думку, дасканалая пасадка даволі верагодная.
Папярэдняя спроба мяккай пасадкі шматразовай ракеты прайшла 10 студзеня. Яна прайшла недасканала — некаторае абсталяванне платформы прыйшлося рамантаваць. Элан Маск назваў і гэта добрым вынікам.
Калі ў SpaceX атрымаецца наладзіць стабільна паспяховыя пасадкі шматразовых ракет, касмічныя палёты могуць заўважна ўпасці ў цане.